Beapmoeboerne lea Storskardesne Nordlaantelaajroen mietie Graesiejaevrien jïh Byjjesmehkien gaskesne, 1,8 km tjöödtjestimmiesijjien noerhtelisnie Graesiejaevriedeepmesjimmien lïhke. Daesnie aaj bïevnesetaavla kultuvremojhtesen bïjre. Beapmoeboernem aaj tsïeglesjamme.
Beapmoeboerne lea boerne dogkesidie. Dagkerh boernh leah åtnasovveme guhkede gietjeste.
Saemieh beapmoeboernh nuhtjin guhkiem 1900-låhkoen. Ulmie lij bearkoem jïh mielhkiem svaaloes tjaavhkodh. Bearkoem biessien sïjse gïebrin, jïh mielhkiem geegki sïjse döömin. Dan mænngan gierkieboernen sïjse bïejesovvi.
Gellie beapmoevåarhkoeh leah boernh deavesne gierkiehealline bijjemes. Göökte dagkerh beapmoeboernh Bissiedurresne. Jeatjah beapmoevåarhkoeh leah deavan bijjelen bïejesovveme, dej leah vïedtjh gierkeste jïh gierkiehealla bijjemes.
Beapmoeboerne Storskardesne lea alnadahkese bïejesovveme mij aareh beavla gïjrege. Marit Lifjell Lappståaposne Finnstumoesne årroeji gellie giesieh. Dïhte beapmoevåarhkoem matkøta gåhtjoeji. Dïhte seapan bearkoeboernine åtnasovvi. Anton Lifjell gie lij båatsoeburrie dajvesne, soptsesti aarebi lij båeries derhviegåetie beapmoeboernen vuelelen. Desnie baatsahtassh feallojste gaavnin. Aktene dejstie jaepietaale 1841 tjåadtjoeji. Anton vïenhti derhviegåetie lij åtnosne dan seenhte goh 1914.
